Pyetja:
A është “bismilah” ajet i sures Fatiha?
***
Përgjigjja:
Shejh Muhamed bin Abduluehab thotë: “Pastaj personi thotë “Bismil-lahir-Rrahmanir-Rrahim” pa zë, sepse ajo (Bismil-lahi) nuk është pjesë (ajet) e sures Fatiha dhe as i sureve të tjera. Ajo është ajet prej Kuranit që vendoset mes dy sureve. Përveç (mes) sures Berau (Teube) dhe Enfal.”
- Argumenti që tregon se “Bismil-lahir-Rrahmanir-Rrahim” nuk thuhet me zë është hadithi i Enesit (Allahu qoftë i kënaqur prej tij!) ku thotë: “Jam falur me të Dërguarin e Allahut ﷺ, me Ebu Bekrin, Umerin dhe Uthmanin dhe nga asnjëri prej tyre nuk dëgjova të lexonte “Bismil-lahir-Rrahmanir-Rrahim” (me zë).” [1]
- “Bismil-lahir-Rrahmanir-Rrahim” është ajet nga Kurani. Por, a është ajet i çdo sureje? Apo është ajet më vete për të ndarë mes sureve? A është ajet nga surja Fatiha apo nuk është prej saj? Në lidhje me këtë çështje ka shumë fjalë nga dijetarët. Ajo që tregon se “Bismil-lahir-Rrahmanir-Rrahim” është prej Kuranit është se sahabët e kanë vendosur atë në mus’haf. E ata nuk kanë futur (vendosur) në të (Kuran) veçse atë që është pjesë e Kuranit.
Transmetohet me zinxhir autentik nga Ibën Abasi (Allahu qoftë i kënaqur prej tij!) i cili ka thënë: “Profeti ﷺ nuk e dinte përfundimin e sures dhe fillimin e sures tjetër, derisa atij iu zbrit “Bismil-lahir-Rrahmanir-Rrahim”. [2]
Nuk ka kundërshtim mes dijetarëve se “Bismil-lahir-Rrahmanir-Rrahim” është ajet që përmendet në brendësi të sures Neml.
Surja Fatiha ka shtatë ajete. Dijetarët që thonë se “Bismil-lahir-Rrahmanir-Rrahim” është ajet i sures Fatiha e llogarisin atë në mesin e shtatë ajeteve. Ndërsa dijetarët që thonë se “Bismil-lahir-Rrahmanir-Rrahim” nuk është ajet i sures Fatiha, si ajet të shtatë llogarisin “gajril-magdubi alejhim ue lad-dalin.”
Dijetarët që thonë se “Bismil-lahir-Rrahmanir-Rrahim” nuk është ajet i sures Fatiha janë argumentuar me fjalën e Profetit ﷺ në hadithin Kudsij: “Allahu Lartësuar thotë: E kam ndarë namazin mes Meje dhe robit Tim në dy pjesë, ndërsa robit Tim i takon ajo për të cilën është lutur. Kur robi thotë: “El-hamdu lil-lahi rabbil-alemin!” Allahu Lartësuar thotë: Më lavdëroi robi im…” E transmeton nga Ebu Hurejra (Allahu qoftë i kënaqur prej tij!). Pra, nuk e ka përmendur “Bismil-lahir-Rrahmanir-Rrahim”.
Shejh Abdulmuhsin el-Abbadi, “Sherh kitab el-adab el-meshij ila es-salah”
Përktheu: Unejs Sheme
——————————
[1] Muslimi
[2] Ebi Davud (788)
[3] Muslimi
