Pyetje: A ekziston në islam të mbjellim pemët duke u bazuar në fazën që është hëna apo ky veprim është shirk?
Përgjigje:
Çështja e mbjelljes së pemëve duke u bazuar në fazat e hënës ka dy aspekte që duhen shqyrtuar: aspektin shkencor dhe aspektin fetar.
Në aspektin shkencor, mund të thuhet se fermerë dhe agronomë të ndryshëm thonë se ciklet hënore ndikojnë në rritjen e bimëve. Dhe kjo bazohet në vëzhgimet që janë bërë ndër shekuj dhe që lidhet me lëvizjen e ujërave dhe të lëngjeve brenda bimëve. Këto janë përvoja bujqësore, të cilat pranohen nga një pjesë e ekspertëve të fushës, dhe nuk kanë lidhje me anën fetare ose ndonjë besëtytni.
Në aspektin fetar, në Islam, veprimet gjykon sipas qëllimit dhe bindjes, në të cilën e bazon veprimin dikush. Nëse dikush beson se hëna ka ndikim të pavarur apo zotëron ndonjë forcë hyjnore të mbinatyrshme në rritjen e bimëve, atëherë ky është shirk, sepse i atribuon krijesave fuqi që i përket vetëm Allahut. Por nëse dikush e konsideron hënën që ndikon thjesht si një shkak i natyrshëm, që Allahu e ka krijuar dhe e ka vendosur si ndikues jo vetvetishëm në natyrë, atëherë kjo nuk hyn është shirk, por mbetet në kuadrin e përvojës njerëzore.
Allahu thotë në Kuran se është Ai që ndikon në rritjen e bimëve, Ai thotë:
“Vallë, a nuk e sheh ti se si Allahu e lëshon ujin prej qiellit dhe nëpërmjet tij krijon fruta llojesh e ngjyrash të ndryshme?!” (Sure el-Fatir: 27)
“Është Ai që lëshon nga qielli ujë, nëpërmjet të cilit Ai nxjerr sythat e çdo bime. Prej kësaj Ne nxjerrim gjelbërim, kokrra gruri në kallinj, palma hurme të ngarkuara me kalaveshë të ulët, kopshte rrushi, ulliri dhe shege, që ngjajnë, por që janë të ndryshëm nga njëri-tjetri. Vështroni frytet e tyre kur formohen dhe piqen. Sigurisht që në këto ka shenja për njerëzit që besojnë.” (Sure en-En’am: 99)
Këto ajete tregojnë se rritja e bimëve është vetëm në dorën e Allahut dhe jo të ndonjë ylli, planeti apo hënës.
Kështu që nëse një bujk përdor ciklet hënore si një metodë tradicionale apo përvojë bujqësore, duke e konsideruar atë si një ligj të krijuar nga Allahu dhe jo si një fuqi të pavarur, atëherë nuk ka problem. Por nëse dikush beson se hëna ka një ndikim të pavarur në fatin ose rritjen e bimëve pa vullnetin e Allahut, atëherë ky është shirk.
Allahu e di më së miri.
Komisioni Pyetje & Përgjigjeve pranë LHSH
