Pyetje:
Kam një pyetje nëse diçka e caktuar më bën mua hipokrit apo jo. Edhe pse jam larg të qenit një musliman i mirë dhe nuk jam në pozitë të gjykoj askënd, e gjej veten duke i gjykuar të tjerët për mëkatet e tyre, ndonëse vetë kam vështirësi me namazin (një çështje që shpresoj ta përmirësoj). Cila sëmundje e zemrës më bën që të mos jem aq i interesuar për mëkatet e mia, por të ndiej trishtim për ato të të tjerëve? Kur dëgjoj të tjerët duke kryer vepra që e zemërojnë Allahun, ndiej zemërim dhe trishtim sepse Allahu (xh.sh) meriton më shumë se aq. Kur shoh të tjerët duke mos e dëgjuar Allahun, diçka në mua dëshiron të bëjë të kundërtën, por përsëri bie pre e veseve të mia. Ju lutem më këshilloni si t’i tejkaloj këto mangësi dhe si të mos ndikohem nga veprat e të tjerëve
Përgjigje:
Falënderimi i takon Allahut…
Nuk kërkohet prej jush që të mos ndieni dhimbje nga mëkatet e njerëzve; përkundrazi, të ndierit i lënduar kur njerëzit e kundërshtojnë Allahun i Cili meriton të adhurohet e jo të kundërshtohet, të falënderohet e jo të mospërfillet janë ndjenja të mira për të cilat ju shpërbleheni. Kjo është pjesë e madhështimit të simboleve të Allahut të Lartësuar. Allahu thotë: “Kjo është kështu! E kush madhëron dispozitat e All-llahut, ajo është shenjë e devotshmërisë së zemrave.” (Kur’an 22:32).
Sidoqoftë, ajo që kërkohet prej jush është që të ndieni dhimbje për mëkatet tuaja më shumë sesa për ato të të tjerëve, pasi mëkatet tuaja ju dëmtojnë juve dhe për to do të jepni llogari.
Prandaj, duhet të forconi ndërgjegjen tuaj se Allahu po ju vëzhgon, të ndieni Madhështinë e Tij dhe t’i frikësoheni zemërimit dhe ndëshkimit të Tij të ashpër. Njohja e dëmit dhe pasojave të këqija të mëkateve do t’ju ndihmojë të kuptoni seriozitetin dhe rrezikun e tyre, qoftë në këtë botë, qoftë në botën tjetër.
Mëkatet shkaktojnë vështirësi në jetesë, sprova dhe një jetë të mundimshme. Çdo e keqe që e godet njeriun në këtë botë është pasojë e mëkateve dhe thyerjes së urdhrave të Zotit. Allahu thotë: “Çfarëdo e keqe që mund t’ju godasë, ajo është pasojë e veprave tuaja (të këqija), e për shumë të tjera Ai u falë” (Kur’an 42:30).
Nëse vazhdoni t’i keni parasysh këto çështje, do t’i kuptoni mëkatet tuaja si diçka të madhe. Në fakt, një nga shenjat e besimit (imanit) është konsiderimi i mëkatit si një çështje shumë serioze.
Besimtari i vërtetë i sheh mëkatet e tij sikur të ishte ulur rrëzë një mali dhe ka frikë se ai do t’i bjerë përmbi, ndërsa hipokriti e sheh mëkatin si një mizë që i qëndron mbi hundë dhe ai thjesht e largon me dorë.
Shenjë e besimit të plotë është ta shohësh mëkatin si diçka shumë të rëndë. Nga ana tjetër, shenjë e mungesës së besimit, e një zemre të sëmurë dhe e depërtimit të cilësive të hipokrizisë në të, është nënvlerësimi i mëkatit.
Prandaj, bëni kujdes nga kjo dhe pendohuni gjithmonë me sinqeritet tek Allahu sa herë që rrëshqitni në mëkat. Kërkoni falje (istigfar) sa më shumë dhe kini frikë ndëshkimin e Tij, por në të njëjtën kohë mbani mendim të mirë për Të, shpresoni në mirësinë e Tij dhe dijeni se shpëtimi juaj vjen vetëm përmes Mëshirës së Tij.
Së fundi, ju rekomandojmë të lexoni librin e Ibn al-Kayyim me titull “Sëmundja dhe Ilaçi” (Ad-Daa’ Wad-Dawaa’), pasi ai përmban shpjegime të shumta mbi efektet e mëkateve. Nëse njeriu reflekton mbi to, do t’i shohë mëkatet e kryera si shumë të rënda dhe do të nxisë veten drejt pendimit të menjëhershëm.
Allahu e di më së miri!
Burimi: Islamweb.net
