Pyetje: Selam alejkum hoxhë!
Çfarë do të thotë fjala e Hasen el-Basriut: “U ra vlera te Zoti dhe e kundërshtuan Atë. Sikur të kishin vlerë tek Ai, do t’i kishte ruajtur nga kundërshtimi”?
Përgjigje: Alejkum selam.
Domethënia e kësaj fjale është se kur dikush vazhdon në mëkate, kjo është shenjë se ka humbur vlerën e tij tek Allahu. Po të kishte qenë i çmuar tek Ai, Allahu do ta kishte ruajtur prej tyre.
Kjo sepse nga akidja e Ehli Sunetit është se Allahu nuk kundërshtohet veçse me lejen e Tij.
Një ngjarje shumë domethënëse në lidhje me këtë besim tregohet për dijetarin Ebu Is’hak el-Esferajini (një nga imamët e Ehli Sunetit) dhe Kadi Abdulxhebbar el-Mu’tezili (një nga imamët e Mu’tezilive).
Një herë, Kadi Abdulxhebbar el-Mu’tezili hyri në një mexhlis ku ndodhej edhe Ebu Is’hak el-Esferajini. Kur e pa, tha:
“Lavdi Atij që është i pastër dhe i dëlirë nga çdo shëmtuar!” (Domethënë: Allahu i Madhëruar, në veprimet e të Cilit nuk ka asgjë të shëmtuar.)
Ebu Is’haku iu përgjigj:
“Lavdi Atij, në mbretërinë e të Cilit nuk ndodh asgjë veçse ajo që Ai dëshiron.”
Pastaj Kadiu pyeti:
“A dëshiron Zoti ynë që t’i bëhet mëkat?”
Ebu Is’haku u përgjigj:
“A mos i bëhet mëkat Zotit tonë me forcë?!”
(Domethënë: A ndodh ndonjë gjë në mbretërinë e Tij pa vullnetin e Tij dhe jashtë kontrollit të Tij?)
