Nijeti është kusht (arab. Shart) prej kushteve të një adhurimi (ibadeti) të saktë qoftë ai agjërimi apo ndonjë adhurim tjetër sipas fjalës së Dërguarit ﷺ:” Me të vërtetë veprat shpërblehen sipas nijetit dhe çdokujt i takon ajo çka ka pasur për qëllim.” (1)
Kështu që, cilidoqoftë adhurim prej adhurimeve nuk saktësohet përveçse me nijet, sikurse natyrisht edhe agjërimi nuk është i saktë përveçse me nijet ngase i Dërguari ﷺ lidhur me këtë tha:” Nuk ka agjërim ai i cili nuk e ka bërë nijetin prej natës.” (2)
Pra, nijeti është kusht i agjërimit dhe për agjërimin e obliguar (sikurse p.sh. agjërimi në Ramazan) është e domosdoshme të bëhet nijeti prej natës e deri para agimit dhe i obligohet agjëruesit të bëjë për çdo ditë nijet të ri sepse çdo ditë është adhurim në vete e cila ka nevojë për nijet të ri me ripërtrirjen e ditëve për shkak fjalës së Pejgamberit ﷺ: ”Me të vërtetë veprat shpërblehen sipas nijetit dhe çdokujt i takon ajo çka ka pasur për qëllim.”
Kur agjëruesi zgjohet për syfyr atëherë ky është nijeti dhe në qoftë se nuk zgjohet përveçse pas agimit por ai e ka pasur të bërë nijetin për agjërim para se të flejë, ai agjëron dhe vazhdon kur zgjohet dhe agjërimi i tij është i saktë për shkak prezencës së nijetit prej natës.
Nijeti nuk bëhet me shqiptim porse ai bëhet me zemër. Shqiptimi i nijetit konsiderohet risi në fe.
Shejhul Islam ibn Tejmije رحمه الله ka thënë:
“Ai që e ka ndërmend të agjërojë ditën e nesërme, ai kështu veç e ka bërë nijetin.” [Sqarim shtesë nga përkthyesi]
(1) Muttefekun alejhi (Buhari dhe Muslimi)
(2) Hadith sahih (i sakt): Nxjerr Nesaiu (2334) prej hadithit të Hafsës radij Allahu anha, dhe këtë hadith e saktëson Shejh Albani në “Sahih Sunen en-Nesai”
[Shejh Salih el Fewzan: El Muntekà 424]
Nga arabishtja: Ardian Elezi
