Pyetja:
A është haram që mashkulli të mbajë zinxhir argjendi?
***
Përgjigjja:
Në parim mashkullit i lejohet të përdorë ndonjë stoli prej argjendi, si p.sh., unaza, mirëpo vënia e zinxhirit të argjendit në dorë apo në qafë konsiderohet prej stolive të veçanta të grave, prandaj burrave u ndalohet t’u përngjajnë grave në veshje dhe në stolitë e tyre dhe anasjelltas. Ibën Abbasi r.a. transmeton se Pejgamberi ﷺ i ka mallkuar burrat që bëjnë përngjasim me gratë dhe gratë që bëjnë përngjasim me burrat.” [1]
Po ashtu transmetohet nga Ebu Hurejra r.a. të ketë thënë: “I Dërguari i Allahut ﷺ i ka mallkuar burrat që veshin veshje grash dhe gratë që veshin veshje burrash.” [2]
Andaj themi se nuk është fare në rregull dhe nuk i ka hije mashkullit të vendosë zinxhir argjendi në dorë apo në qafë, edhe pse në esencë argjendi është i lejuar për mashkullin, mirëpo në këtë rast ndalesa është për shkak të përngjasimit me gratë.
Allahu e di më së miri.
Dr. Shefqet Krasniqi
————————————————————
[1] Buhariu, nr. 5885.
[2] Ebu Davudi, nr. 4098. Albani e ka konsideruar sahih.
