Përgjigje:
Qëllimet bazike të Islamit përfshijnë ruajtjen e fesë, të shpirtit njerëzor, të nderit, të mendjes dhe të pasurisë. Çdo substancë ose veprim që dëmton ndonjërën nga këto pesë shtylla konsiderohet i ndaluar në Islam.
Armiqtë e Islamit dhe të njerëzimit kanë luftuar kundër kësaj feje dhe janë përpjekur të largojnë muslimanët nga feja e tyre nëpërmjet mjeteve të ndryshme. Allahu i Plotfuqishëm thotë: “Të pyesin ty për luftën në muajt e shenjtë. Thuaj: ‘Lufta në to është mëkat i madh, por ndalesa nga rruga e Allahut, kufri në Të, pengimi nga Mesxhidul-Haram dhe dëbimi i banorëve të tij janë më të mëdha tek Allahu. Fitneja (kufri) është më e rëndë se vrasja.’ Ata nuk do të pushojnë së luftuari kundër jush derisa t’ju kthejnë prej fesë suaj, nëse munden. Dhe kushdo nga ju që kthehet nga feja dhe vdes si jobesimtar – atyre u janë prishur veprat në këtë botë dhe në botën tjetër…” (Bekare 217)
Armiqtë e Islamit e dinë mirë se burimi i vetëm i forcës së muslimanëve është përkushtimi i tyre ndaj Islamit. Prandaj ata përdorin mjetet më të ulëta dhe djallëzore për të kontrolluar dhe prishur, sidomos rininë. Ata e dinë se mënyra më e shpejtë për të shkatërruar të rinjtë muslimanë është përmes armës së epsheve: gratë joshëse, alkooli dhe droga.
Më e keqja dhe më efikasja nga këto ka qenë arma e drogës, sepse është e drejtuar ndaj zemrës së umetit dhe mburojës së tij mbrojtëse – të rinjve, të cilët mbajnë mbi supe përgjegjësinë për të mbrojtur dhe zhvilluar umetin në rrugën e përparimit. Kur të rinjtë shkatërrohen, i gjithë umeti shkon drejt shkatërrimit, dhe bëhet një pre e lehtë për këdo që dëshiron të shfrytëzojë burimet dhe pasuritë e tij.
Islami ndalon përdorimin e të gjitha llojeve të dehësve, qoftë në formë pijesh, tabletash, pikash, substancash që thithen, injeksionesh etj.
Thotë Allahu (subhanehu ue teala):
“Ata që ndjekin të Dërguarin, Pejgamberin analfabet, të cilin e gjejnë të shkruar tek ata në Teurat dhe Inxhil , ai i urdhëron për të mirën, dhe i ndalon nga e keqja, u lejon atyre gjërat e mira dhe ua ndalon të ndyrat, u lehtëson barrët e rënda dhe zinxhirët që ishin mbi ta. Pra, ata që besojnë në të, e nderojnë, e ndihmojnë dhe ndjekin dritën që i është shpallur (Kur’anin), ata janë të shpëtuarit.” (A’rafë 157)
Dhe nuk ka dyshim se drogat hyjnë te gjërat e ndyra që Islami i ka ndaluar.
Allahu i Madhërishëm thotë : “O ju që besoni! Mos e hani pasurinë e njëri-tjetrit në mënyrë të padrejtë, përveç nëse është tregti me marrëveshje të ndërsjellë. Dhe mos e vrisni vetveten (dhe mos vrisni njëri-tjetrin). Me të vërtetë, Allahu është i mëshirshëm ndaj jush.” (Nisa 29)
Poashtu edh shkenca ka vërtetuar se përdorimi i drogës çon në vdekje dhe mvarësi që është shkatrimtare si për individin, por edhe më gjerë.
Ummu Seleme (Allahu qoftë i kënaqur me të) transmeton:
“Pejgamberi (paqja qoftë mbi të) e ndaloi çdo gjë që deh ose bën njeriun të paaftë për të menduar (ose që mpin trurin).” (Imam Ahmedi)
Dijetarët muslimanë ndër shekuj kanë dënuar përdorimin e substancave dehëse dhe halucinogjene dhe kanë dhënë fetva për ndalimin e tyre, thotë ibn Tejmije (Allahu e mëshiroftë):“Hashashi (kanabisi) është i ndaluar, qoftë edhe nëse nuk e humb plotësisht mendjen. Ai është më i merituar të ndalohet se sa alkooli, sepse dëmi i tij është më i madh.”
Përmblodhi: Enis Arifi/ https://www.rizgjimi.com/
