Pyetje: Selam alejkum. Nëse e arrin imamin në ruku dhe merr vetëm një tekbir, a është namazi në rregull?
Përgjigje: Për ta arritur imamin në ruku – domethënë për të kapur rekatin bashkë me të – shtrohet pyetja: A mjafton vetëm një tekbir, apo duhen dy tekbire (një për tekbirin fillestar dhe një për ruku)?
Kur dikush hyn në namaz, dihet se imami thotë “Allahu ekber”, xhemati gjithashtu thotë “Allahu ekber” dhe pastaj vazhdon namazin. Mirëpo, nëse e kemi arritur imamin drejtpërdrejt në ruku dhe duam ta kapim atë rekat, a mjafton vetëm një tekbir apo jo?
Tekbiri në këtë rast, për atë që vjen në xhami dhe e sheh imamin në ruku, ndahet në tri forma:
- Forma e parë: Nëse e bën vetëm tekbirin fillestar për të hyrë në namaz (“Allahu ekber”) dhe nuk bën një tekbir tjetër të veçantë për ruku, sipas shumicës së dijetarëve dhe fukahave kjo mjafton edhe për tekbirin e rukusë.
- Forma e dytë: Nëse e merr një tekbir (“Allahu ekber”) me nijet të dyfishtë: edhe për tekbirin fillestar, edhe për të shkuar në ruku. Edhe kjo është e vlefshme sipas mendimit më të saktë.
- Forma e tretë (Problematike): Nëse bën vetëm tekbirin për ruku, por nuk e bën tekbirin fillestar për të hyrë në namaz. Në këtë rast, namazi nuk konsiderohet i rregullt.
- Pse? Sepse nuk është kryer një nga kushtet e namazit, që është tekbiri fillestar (pa të cilin nuk mund të hyhet në namaz).
- Personi në fjalë ka marrë tekbir vetëm me nijetin për të shkuar në ruku, por jo me nijetin për të hyrë në namaz.
- Atëherë, në këtë rast namazi nuk është lidhur dhe nuk llogaritet si namaz, sepse mungon tekbiri fillestar.
Përfundim: Nëse dikush ka vepruar kështu (pa e bërë tekbirin fillestar), duhet ta përsërisë nga fillimi: të ngrihet në këmbë, të marrë tekbirin fillestar (“Allahu ekber”) duke i ngritur duart, e pastaj të vazhdojë me imamin aty ku ndodhet.
