Pyetja: Jam duke mësuar leximin e Kuranit te një grua pakistaneze, e ndonjëherë edhe më shpjegon për çështjet e fesë. Një ditë më tha se nuk duhet të themi Zot (në anglisht God), por duhet të themi vetm Allah. Sa qëndron kjo?
Përgjigjja:Falënderimet i takojnë Allahut të Lartësuar, përshëndetjet lëvdatat të Dërguarit të Tij.
Allahu i Lartësuar i ka emrat më të bukur. Në lidhje me këtë Ai thotë: “Allahu posedon emrat më të bukur, andaj Atë luteni me ta”. Kaptina Arafë, ajeti 180. Emri Allah është më i madhi, mirëpo edhe emri “Rabb” (Zoti) është prej emrave të Bukur të Tij.
Gjithashtu këtë emër të Allahut e përdorën edhe shumë pejgamberë kur e lusnin Atë:
“Ata dy (Ademi dhe Hava) thanë: Zoti ynë! ne i bëmë padrejtësi vetes (që mëkatuam), nëse Ti nuk na falë e na mëshiron, do të jemi prej të dëshpëruarve”. (Arafë, 23).
“Nuhu tha: Zoti im! unë i thirra njerëzit (në fenë Tënde) natën dhe ditën…” (Nuh, 5).
Ibrahimi tha: “Zoti im! më bëj mua dhe pasardhësit e mi prej atyre që e falin namazin…” (Ibrahim, 40).
Muhamedi ﷺ, ndër lutjet që i bënte ishte edhe kjo: “Zoti im! më ndihmo mua (kundër armiqëve), e mos u ndihmo (atyre) kundër meje…” (Shënon Tirmidhiu).
Sipas kësaj që u përmend se pejgmaberët e lusnin Allahun me këtë emër, dhe duke mos patur ndonjë ndalesë për përdorim e këtij emri të Allahut kur e lusim Atë, rezulton se nuk ka kurrëfarë ndalese as pengese që në lutjet tona të themi “Ja Rabi”, ose: O Zoti im.
Allahu e di më së miri.
Hoxhë Dr. Rasim Haxha
