Pyetja:
Kam djalin 1 vjeç dhe shpeshherë urinon në dyshek dhe lëviz në atë gjendje. Është bërë e mundimshme, pasi unë laj çdo gjë duke menduar se mund të jetë bërë pis dhe s’jam e pastër për namaz. Jam bërë me vesvese. A mjafton vetëm larja e djalit dhe dyshekut?
***
Përgjigjja:
Me Emrin e Allahut, të Gjithëmëshirshmit, Mëshiruesit!
Është shumë e natyrshme që nënat të përballen me probleme të kësaj natyre, andaj nuk ka vend për vesvese ngase njëra prej parimeve të fesë është se ajo është e lehtë, e, rrjedhimisht, nëse besimtari vëren se në fenë e tij ka diçka që po i duket shumë e vështirë, atëherë me gjasë vetë ai ia ka vështirësuar vetes ose nuk ka qenë i kujdesshëm për të pyetur rreth asaj çështje njerëzit e dijes. Allahu i Lartësuar thotë në Kuran: “Pyetini njerëzit e dijes nëse nuk dini.”
Gjërat që e prishin abdesin janë të përcaktuara. Dijetarët i kanë përmbledhur ato në tetë gjëra:
1 – Çdo gjë që del nga organet gjenitale dhe nga anusi.
2 – Çdo gjë e papastër që del nga pjesët e tjera të trupit.
3 – Humbja e vetëdijes.
4 – Prekja e gruas me epsh.
5 – Prekja e organit gjenital ose anusit.
6 – Ngrënia i mishit të devesë.
7 – Pastrimi i kufomës (sipas njërit mendim).
8 – Dalja nga Islami.
Sa i përket problemit që cekët, mjafton të lahet djali dhe dysheku në përgjithësi, derisa të zhduken gjurmët e urinës, rrjedhimisht edhe duart, por nuk ka nevojë të frikësohesh se “mos kam stërpikur këndej apo andej”, “mos kam harruar ndonjë vend”, “mos ka kërcyer ndonjë stërpikë në tepih e nuk e kam vënë re unë”, e shumë e shumë vesvese që mund të të shfaqen, e që shpeshherë mund të jenë nga shejtani i mallkuar, ngase qëllimi i tij është që besimtarëve t’ua bëjë të vështira adhurimet, gjegjësisht abdesin i cili është çelësi i hyrjes në adhurimin më të madh, namazin.
Po ashtu, kujto se Allahu i Lartësuar ka thënë në Kuran: “Allahu nuk ngarkon askënd përtej mundësive të veta.”
Nëse dëshironi, kthejuni edhe përgjigjes në vijim:
https://pergjigje.net/a-prishet-abdesi-kur-pastron-nje-femije/
Allahu e di më së miri!
Paqja dhe mëshira e Allahut qofshin mbi Muhamedin ﷺ, familjen dhe shokët e tij!
Hekuran Helshani
Përgjigje.net
