Pyetje
Kam një djalë që po i afrohet moshës 13 vjeç dhe ka filluar të tregojë shenjat e pubertetit. Burri im ka vendosur t’i flasë për këtë temë (përfshirë edhe çështjet seksuale). Ajo që më shqetëson është se ai ka kërkuar që unë të jem e pranishme gjatë bisedës, me arsyetimin se, nëse djali ka pyetje në lidhje me trupin e femrës, nëna mund të jetë udhëzuesja më e mirë për të. Jam e pavendosur se çfarë duhet të bëj. A është e lejuar kjo në Islam apo jo? Ju lutem, më informoni.
Përgjigje
Falënderimi i takon Allahut, ndërsa salevatet dhe selamet qofshin mbi Pejgamberin e Allahut, mbi familjen e tij, mbi sahabet dhe mbi të gjithë ata që e pasojnë këtë Pejgamber deri në Ditën e Gjykimit.
Çështjet e lidhura me seksualitetin janë instinkt natyror që Allahu i Lartësuar ka vendosur te krijesat e Tij, përfshirë edhe kafshët, e lëre më te njerëzit. Nuk është e nevojshme që prindërit të flasin drejtpërdrejt me fëmijët për këto çështje. Përkundrazi, ata duhet të përqendrohen në edukimin e tyre të shëndoshë, forcimin e besimit dhe mësimin e dispozitave të fesë që u nevojiten, si ato mbi pastërtinë, abdesin, namazin dhe agjërimin.
Po ashtu, prindërit duhet t’i drejtojnë fëmijët drejt vendeve të sigurta dhe t’i mbajnë larg ndikimeve negative, përfshirë pajisjet dhe programet moderne që mund të dëmtojnë zemrën dhe mendjen e tyre. Një tjetër aspekt i rëndësishëm është mbikqyrja që ata duhet të rrethohen me shoqëri të mirë dhe të hajrit e të angazhohen në aktivitete të dobishme.
Gjithashtu, prindërit duhet të jenë model i mirë për fëmijët e tyre, sepse një sjellje e drejtë dhe e matur nga ana e tyre ndikon pozitivisht në edukimin e tyre. Një faktor i rëndësishëm në këtë proces është lutja e prindërve për fëmijët e tyre, pasi ajo ka një ndikim të jashtëzakonshëm. I Dërguari i Allahut (paqja dhe bekimet e Allahut qofshin mbi të) ka thënë:
“Tri lutje janë të pranuara pa asnjë dyshim; lutja e prindit, lutja e udhëtarit dhe lutja e të dëmtuarit.” Shejh Albani e ka vlerësuar si të mirë. Shiko “Vargu i saktë” me nr. 596.
Në fund, duam të tërheqim vëmendjen për shenjat e pubertetit që kanë përmendur dijetarët. Shenjat e përbashkëta për djemtë dhe vajzat janë:
- Lëshimi i spermës (ejakulimi) gjatë zgjimit ose në gjumë.
- Rritja e qimeve pubike.
- Mbushja e 15 viteve.
Ndërsa vajzat kanë dy shenja shtesë: menstruacionet dhe shtatzënia.
Allahu e di më së miri
Burimi: Islamweb.net Solli në gjuhën shqipe; pergjigjet.net
