Pyetja:
Nëse të vjen të teshtish dhe je duke u falur, a lejohet të thuash “elhamdulilah”? A prishet namazi?
***
Përgjigjja:
Muauije Bin el Hakm es Selemi ka thënë: “Falesha me të Dërguarin e Allahut ﷺ, një person teshtiu e i thashë: ‘Allahu të mëshiroftë!’ Njerëzit me shikimin e tyre dukeshin sikur po më flakëritnin dhe u thashë se çfarë ka që shikoni nga unë? Filluan të godasin me duart mbi kofshët e tyre, e kuptova ata kërkonin që të heshtja. Kur Profeti ﷺ mbaroi namazin, nuk kam parë mësues më të mirë se ai. Vallahi, nuk urreu, nuk më goditi e nuk më shau, por më tha: ‘Në namaz nuk pranohen fjalët e njerëzve, ai është tesbih, tekbir dhe lexim Kurani’.” [1]
Shafiu dhe Maliku e të tjerë veç tyre thonë: “Atij që i vjen të teshtijë në namaz, e ka të pëlqyeshme që të falënderojë Allahun pa zë.”
Ibn Umeri, Nehaiu dhe Ahmedi thonë: “E falënderon Allahun me zë.”
E para është më e qartë, sepse ajo është dhikr dhe sunneti për dhikrin në namaz është në fshehtësi…” En Neueui.
Hadithi i Muauijes tregon se Profeti ﷺ nuk e urdhëroi atë që të përsëriste namazin.
Tomor Boriçi
———————–
[1] Muslimi
