Pyetje: Lidhur me fjalën e Allahut të Madhëruar: “Hebrenjtë thanë: Uzejri është bir i Allahut” [Et-Teube: 30], a e thonë këtë fjalë të gjithë ata, apo vetëm disa prej tyre?
Gjithashtu, lidhur me thënien e Profetit ﷺ: “Do të sillen hebrenjtë Ditën e Gjykimit dhe do t’u thuhet: ‘Çfarë keni adhuruar?’ E ata do të thonë: ‘Uzejrin'” – a është ky një përgjithësim që u drejtohet të gjithë atyre apo jo?
Përgjigjja e Ibn Tejmijes (Allahu e mëshiroftë):
”Falënderimi i takon Allahut…
Me fjalën ‘hebrenjtë’ këtu nënkuptohet gjinia e tyre (si lloj/grup), ashtu siç është fjala e Allahut të Madhëruar: ‘Ata, të cilëve njerëzit u thanë: Njerëzit janë mbledhur kundër jush…’ [Al-Imran: 173]. Këtu nuk është thënë ‘të gjithë njerëzit’, e as (ata që sollën lajmin) nuk thanë se të gjithë njerëzit e botës janë mbledhur kundër jush, por qëllimi është për gjininë (një grup prej tyre).
Kjo është njëlloj siç thuhet: ‘Ky grup bën kështu’ ose ‘Banorët e këtij vendi bëjnë kështu’.
Po ashtu, kur disa prej tyre thonë diçka dhe pjesa tjetër hesht e nuk e kundërshton atë, ata bëhen pjesëmarrës në mëkatin e asaj thënieje. Allahu e di më së miri.”
×
![]()
