Pyetje: Kur jam e lidhur në namaz, harroj shumë. Nëse ka mundësi, më udhëzoni dhe më ndihmoni?
Përgjigje:
Falënderimi i takon Allahut, Zotit të botërave. Paqja dhe bekimi i Allahut qofshin mbi të Dërguarin tonë, Muhamedin, familjen e tij, shokët e tij dhe të gjithë ata që e pasojnë atë deri në Ditën e Gjykimit.
Duhet të kesh parasysh disa këshilla që mund të ndihmojnë:
1. Para namazit
Para se të lidhesh në namaz, e dashur motër, përgatit veten shpirtërisht. Tani është koha e namazit, prandaj mbaro punët dhe angazhimet që ke përpara se të falesh, në mënyrë që të mos e kesh mendjen tek ato gjatë faljes, por të jesh e përqendruar në namazin tënd.
Allahu i ka lavdëruar besimtarët dhe ka përmendur se nga cilësitë e tyre është se ata falen me përulësi dhe janë të kujdesshëm për namazin e tyre:
(الَّذِينَ هُمْ فِي صَلَاتِهِمْ خَاشِعُونَ)
“Ata të cilët janë të përulur dhe janë të kujdesshëm gjatë faljes së namazit.”
[Sureja Mu’minun: 2]
2. Gjatë faljes
Që në momentin që lidhesh në namaz duke thënë tekbirin e ihramit, përpiqu të lexosh suren Fatiha, një sure tjetër dhe të gjitha theniet në ruku, sexhde, duke i ndier kuptimet e tyre.
Nëse, pavarësisht përpjekjes, përqendrimi largohet, kërko mbrojtje tek Allahu nga shejtani.
Është transmetuar nga Muslimi se një sahabi, Uthman bin Ebi El-Asi -radiAllahu anhu-, iu ankua Profetit -alejhi selam- për namazin e tij, duke thënë se shejtani e ngacmonte dhe e ngatërronte në leximin e tij. Profeti i tha:
“Ai shejtan quhet Khanzab. Nëse e ndjen që të ngacmon, kërko mbrojtje tek Allahu nga ai dhe pështy tre herë nga ana e majtë.”
Tha (Uthmani): “E veprova këtë dhe Allahu e largoi nga unë.”
Mënyra: Thua: “Eudhu bi Lahi minesh-shejtani rraxhim”, lëviz pak kokën majtas dhe pështyn tre herë.
3. Përcakto llojin e harresës gjatë namazit
- Nëse harron ndonjë rukn (shtyllë) të namazit, si rukunë, sexhden apo ndonjë rukn tjetër, e ke detyrë ta bësh atë dhe duhet të bësh sexhden e harresës.
- Nëse harron ndonjë vaxhib të namazit, si teshehudin e parë në namazet me tri ose katër rekate, nuk ke detyrë ta rikthesh, por para selamit bëhet sexhdeja e harresës.
- Sexhdja e harresës përmban dy sexhde dhe jepet selam pas tyre.
- Nëse harron një prej suneteve të namazit, nuk ka ndonjë pasojë dhe nuk bëhet sexhdeja e harresës.
Këto ishin disa këshilla që u mundova t’i përmbledh, duke lutur Allahun që të kenë dobi. Allahu na furnizoftë me përqendrim në namaz dhe na bëftë të kujdesshëm ndaj tij.
Dr. Adelina Kuçana
