Të jesh musliman do të thotë se je antishqiptar – këtë e thonë ata që e luftojnë Islamin, qofshin prej feve të tjera apo që nuk janë fare fetarë, duke u përpjekur përmes kësaj të sjellin dyshime mbi Islamin dhe t’i largojnë njerëzit prej tij. Sidomos në kohët e sotme, kur një pjesë e madhe e të rinjve janë kthyer te kjo fe, këto grupe mundohen të përhapin idenë se nëse njeriu i përmbahet fesë, ai do të jetë kundër kombit të tij – një gjë kjo që nuk është e vërtetë.
Ne e dimë se nuk janë vetëm shqiptarët muslimanë; me qindra kombe në botë janë muslimanë. Asnjëri prej tyre nuk ka vepruar kundër kombit të vet vetëm pse është musliman. Asnjëri prej tyre nuk është asimiluar apo ka ndryshuar kombësinë për shkak të Islamit, duke u bërë arab, turk apo diçka tjetër. Përkundrazi, secili i është përmbajtur gjuhës, traditave (që nuk janë në kundërshtim me Islamin) dhe vendit ku ka jetuar. Nuk ka ndryshuar asgjë përveç traditave që bien ndesh me Islamin, të cilat i ka korrigjuar edhe vetë Pejgamberi, salAllahu alejhi ue selem. Megjithatë, nuk ka ndodhur kurrë në histori që njerëzit të asimilohen apo të ndryshojnë kombin dhe gjuhën e tyre për shkak se janë muslimanë.
Shqiptarët kanë qenë muslimanë për shumë shekuj. A kanë qenë ndonjëherë kundër kombit apo gjuhës së tyre? Jo, përkundrazi, ata kanë kontribuar njësoj si të gjithë të tjerët për vendin e tyre.
Allahu i ka krijuar njerëzit në popuj, fise dhe gjuhë të ndryshme. Ky diversitet i popujve, kombeve dhe fiseve përmendet nga Allahu si një vlerë.
/Hoxhë lulzim Perçuku/
