Fjalia “semiallahu limen hamide” dhe “rabena ue lekel-hamd” a thuhet edhe nga xhemati?

Një hadith ka qenë shkak i keqkuptimit se fjalia “semiallahu limen hamide” është për imamin dhe fjala “rabena ue lekel-hamd” është për atë që falet pas imamit.

Ky hadith është hadithi i Enes bin Malikut i cili tregon se Profeti ﷺ u rrëzua një herë nga kali dhe u gërvisht në anën e tij të djathtë. Ne shkuam për ta vizatuar dhe erdhi koha e namazit dhe ai u fal me ne imam ulur dhe ne u falem pas tij ulur. Kur e mbaroi namazin tha: “Imami është bërë që të ndiqet, kur të bëjë tekbir bëni tekbir, kur të bëjë sexhde bini në sexhde, kur të ngrihet ngrihuni, kur të thotë “semiallahu limen hamide” thoni “rabena ue lekel-hamd” dhe kur të falet ulur faluni të ulur të gjithë.” [1]

Shejh Albani në librin Forma e Namazit thotë: Ky hadith nuk tregon se ai që falet pas imamit nuk thotë “semiallahu limen hamide” siç nuk tregon se imami nuk e shoqëron atë në fjalën “rabena ue lekel-hamd” sepse hadithi nuk ka ardhur për të sqaruar se çfarë thotë imami dhe ai që falet pas tij në këtë fazë të namazit, por për të sqaruar se fjala “rabena ue lekel-hamd” nga ana e atij që është pas imamit duhet të jetë pas fjalës “semiallahu limen hamide” të imamit.

Këtë e përkrah edhe fakti se Profeti ﷺ thoshte “rabena ue lekel-hamd” ndërkohë që ishte imam dhe gjithashtu edhe përgjithësimi i Profetit ﷺ kur ka thënë: “Faluni siç më keni parë të falem.” tregojnë se ai që falet pas imamit thotë atë që thotë imami: fjalën “semiallahu limen hamide” dhe çdo gjë tjetër.

Në lidhje me fjalën semiallahu limen hamide imam Neveviu në shpjegimin e Muslimit thotë: “Është e pëlqyeshme për imamin dhe atë që falet pas tij dhe atë që falet vetëm të thonë: “semiallahu limen hamide” dhe “rabena ue lekel-hamd” dhe të bashkojnë mes tyre duke thënë: “semiallahu limen hamide” kur ngrihen nga rukuja dhe “rabena ue lekel-hamd” pas ngritjes në qëndrimin drejt për shkak të fjalës së Profetit ﷺ: “Faluni siç më keni parë të falem.”

Ky sqarim i imam Neveviut është transmetuar nga Ebu Hurejra (Allahu qoftë i kënaqur me të!), se Profeti ﷺ thoshte “semiallahu limen hamide” kur ngrinte shpinën e tij nga rukuja pastaj thoshte kur ishte në këmbë “rabena ue lekel-hamd”. [2]

Dr. Abdullah Nebolli