Pyetja:
Punoj prej orës 8 të mëngjesit deri në orën 16 të pasdites dhe më duhet të udhëtoj nga shtëpia deri në vendin e punës 25 km në një drejtim. A mund ta shkurtoj namazin dhe ta bashkoj apo jo?
***
Përgjigjja:
Falënderimet i takojnë Allahut, paqja dhe bekimet e Tij qofshin mbi të Dërguarin e Tij, Muhamedin ﷺ, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.
Shkurtimi dhe bashkimi i namazeve janë lehtësime specifike të muslimanit i cili është në udhëtim. Ndërsa largësia prej 25 kilometrash, të cilin ju e bëni nga shtëpia deri në vendin e punës, nuk konsiderohet udhëtim që t`ju lejohet ta shkurtoni e bashkoni namazin. Prandaj, ju këshillojmë që të jeni të përpiktë në faljen e namazeve me kohë dhe të mos neglizhoni në këtë. Edhe nëse nuk e arrini ikindinë në shtëpi, atëherë faleni në punë. Allahu ju ndihmoftë!
Alaudin Abazi
