Pyetja:
Të sëmurit apo shtatzënës, pra atyre që falen ulur, a u pakësohet shpërblimi i namazit të tyre apo e kanë shpërblimin sikur të falen në këmbë?
***
Përgjigjja:
Qëndrimi në këmbë është kusht për vlefshmërinë e namazit për atë që është i shëndoshë, ndërsa për atë që ka arsye të justifikueshme, si në rastin konkret i sëmuri apo shtatzëna e cila ka vështirësi të qëndrojë në këmbë, atëherë ata dhe ato namazin e falin duke qëndruar ulur, apo në cilëndo formë që u vjen më lehtë, kurse shpërblimi i namazit të tyre nuk pakësohet.
Imam Neveviu thotë: “Umeti kanë mendim unanim (ixhma) se kush nuk ka mundësi të qëndrojë në këmbë në namaz, falet i ulur dhe nuk ka nevojë ta përsërisë namazin.” [1]
Pejgamberi ﷺ ka thënë: “Kur sëmuret robi apo kur është në udhëtim, i shkruhen shpërblimet-sevapet e punëve që ka bërë kur ishte i shëndoshë dhe në vendbanim.” [2]
Allahu e di më së miri.
Dr. Shefqet Krasniqi
———————-
[1] El-Mexhmu’u, 4/310.
[2] Buhariu, nr. 2996.
