Pyetja:
E kam bërë një hatme por po bëj nga pak gabime. A pranohet ajo hatme?
***
Përgjigjja:
Falenderimi i takon Allahut, ndërsa salavatet dhe selamet qofshin mbi të Dërguarin tonë, Muhamedin ﷺ, mbi familjen e tij të pastër, mbi shokët e tij besnik, si dhe mbi të gjithë ata që e pasuan dhe e pasojnë rrugën e tij deri në Ditën e Gjykimit.
Muslimani duhet të mundohet që të mësojë leximin e Kuranit sa më mirë dhe ta lexojë atë sa më rrjedhshëm, në mënyrë që të fitojë shpërblimet dhe të arrijë meritat e lexuesve të Kuranit në Ditën e Gjykimit. Por nëse edhe pas mundit dhe përpjekjes së dhënë prej tij për të mësuar leximin e Kuranit, bën gabime dhe nuk mund ta lexojë atë aq rrjedhshëm, ai për këtë ka shpërblim tek Allahu dhe shpresë për pranimin e këtij adhurimi.
Pejgamberi ﷺ ka thënë: “Ai i cili e lexon Kuranin rrjedhshëm dhe me përpikëri, do të jetë me melaiket e ndershme (në Ditën e Gjykimit), ndërsa ai i cili e lexon atë më vështirësi, do të ketë shpërblimin e dyfishuar.“ [1]
Kështu që ai cili lexon Kuranin me vështirësi, ka dy shpërblime për këtë. Një shpërblim për leximin e tij dhe një shpërblim për vështirësinë që ndjen gjatë leximit të tij.
Andaj, shpresojmë që leximi i juaj të jetë i pranuar tek Allahu dhe nëpërmjet tij të arrini dy shpërblime. Vetëmse duke mos lënë anash përpjekjet për të përvetësuar atë dhe për të përmirësuar gabimet që bëni gjatë leximit të tij.
Allahu e di më së miri.
Hoxhë Omer Bajrami
—————————
[1] Muslimi
Comments are closed.