Pyetja: Dëshiroj t’ju pyes në lidhje me parfumosjen e femrave.
A është e vërtetë se nëse një grua vendos parfum dhe aroma e tij ndjehet nga meshkujt, atëherë namazi i saj nuk është i vlefshëm?
Dhe nuk i lejohet një gruaje të dalë në xhami e parfumuar, edhe nëse nuk ka për qëllim të joshë burrat. Nëse e bën këtë, ajo duhet të kthehet dhe të marrë gusl, njësoj si për papastërtitë e mëdha rituale, nëse parfumi është në të gjithë trupin. Nëse parfumi është vetëm në një pjesë të trupit, mjafton të lajë atë zonë. E njëjta vlen edhe nëse parfumi është në rroba — duhet ta lajë zonën përkatëse ose ta ndërrojë rrobën.
Nëse gruaja nuk e pastron parfumin, namazi i saj është i vlefshëm dhe nuk e ka obligim ta përsërisë atë.
Është transmetuar në Sunenin e Ebu Davudit, nga Ebu Hurejra, se një grua u takua me të dhe ai ndjeu aromën e parfumit prej saj. Ai e pyeti nëse kishte ardhur nga xhamia dhe nëse ishte parfumuar. Kur ajo u përgjigj “po”, ai tha:
“E dëgjova të dashurin tim, Ebu el-Kasim (Profetin alejhi selam), duke thënë: ‘Namazi i një gruaje që parfumoset për këtë xhami nuk do të pranohet derisa të kthehet dhe të kryejë larjen rituale për papastërti të madhe.’”
(Ebu Davud — sahih sipas shejh Albanit)
Komentet e dijetarëve:
- El-Manawi në Fajd el-Kadir: Mohimi i pranimit këtu nënkupton mohimin e shpërblimit, si formë ndëshkimi dhe frenimi.
- Nuruddin el-Qari në Mirkat el-Mefatih: Larja duhet të përfshijë trupin nëse parfumi është në të gjithë trupin, përndryshe vetëm zona e prekur.
- Ibn el-Malik: Kjo ndalesë është një paralajmërim, sepse aroma ngjall epsh dhe hap derën për sprovë.
Nëse një grua nuk është parfumuar për qëllimin e xhamisë, por për një vend tjetër dhe më pas e zë namazi dhe hyn në xhami, atëherë nuk ka obligim për larje.
Ndërsa parfumosja jashtë xhamisë ka rrethana të ndryshme. Mund të konsiderohet mëkat i madh, ndalesë ose thjesht veprim i papëlqyeshëm, në varësi të situatës.
Lidhur me kremrat që kanë aromë parfumi, edhe ato janë të ndaluara nëse aroma ndjehet nga burrat, edhe nëse gruaja nuk e ka për qëllim këtë. Por nëse ndodh, namazi mbetet i vlefshëm dhe nuk ka nevojë të përsëritet.
Allahu e di më së miri.
Hoxhë Kastriot Bardhi
